RUSIZI : Barakekwaho gutorokana miliyoni 4 za SACCO

Abakozi babiri ba Cooperative intsinzi SACCO yo mu Murenge wa Nzahaha mu Karere ka Rusizi baherutse gutoroka akazi bikaba bikekwa ko baranatorokanye amafaranga asaga miliyoni icyenda z’iyi SACCO. Ikigo cy’igihugu gishinzwe amakoperative RCA kikaba cyatangiye iperereza ngo hamenyekane neza ingano y’amafaranga yibwe. Hagati aho Perezida w’inama y’ubutegetsi y’iyi Sacco akaba avuga ko imirimo ikomeje kandi ko inzego z’umutekano zikomeje gushakisha aba bakozi ngo bashyikirizwe ubutabera. Aba bakozi barimo umucungamutungo w’iyi Sacco Mukeshimana Theogene na Kontabure wayo Nkurunziza Theogene. Umucungamutungu w’iyi SACCO mu cyumweru gishize nibwo yari yagiye kubikuza amafaranga agera kuri miliyoni enye n’igice muri Banki I Kamembe nyamara ntiyongera kugaruka ku kazi nkuko ushinzwe amakoperative mu Murenge wa Nzahaha Hitimana Eustache yabitangaje. Perezida w’inama y’ubutegetsi ya Cooperative intsinzi SACCO Nzahaha, Masengesho Etienne avuga ko uretse ayo mafaranga yari yagiye kubikuzwa n’Umucungamutungo kugeza ubu hataramenyekana umubare nyakuri w’amafaranga yose yibwe; gusa akomeza yizeza ko n’ubwo abakozi batorotse akazi bitahagaritse serivise ku banyamuryango. Kugeza ubu aba bakozi bombi b’Insinzi SACCO baracyashakishwa; Umuvugizi wa Polisi y’Igihugu mu Ntara y’Iburengerazuba Chief Superitendant Francis Gahima akaba asaba ko mu gihe habaye ikibazo runaka hajya hihutishwa gutanga amakuru kugira ngo abanyacyaha bafatwe.