Umujyi wa Kigali wamaze kubona umuyobozi mushya

Umuyobozi mushya w’umujyi wa Kigali usimbura Monique Mukaruriza yamaze kuboneka. Uyu ni Pascal Nyamurinda wahoze ayobora umushinga wo gutanga indangamuntu .Ayo matora nk’uko biteganywa n’itegeko, yakozwe mu buryo butaziguye mu cyumba cy’inama y’umujyi wa Kigali .Abitabiriye amatora bari 196 kuri 214 .

Abo ni abagize njyanama ku rwego rw’umujyi wa Kigali,njyanama ku turere tw’umujyi wa Kigali n’abagize njyanama mu mirenge iri muri utwo turere twa Kicukiro,Gasabo na Nyarugenge.

Uwahatanye na Nyamurinda ni madamu Aurore Umuhoza wagize amajwi 35 mu gihe Meya mushya yagize amajwi 161

Pascal Nyamurinda asimbuye Monique Mukaruriza wari umaze amezi 11 ku buyobozi bw’umujyi wa Kigali. Bwana Nyamurinda ni umugabo w’imyaka 53.

Afite impamyabushobozi mu mibanire y’ibihugu (Public Relations) n’iyo kuyobora imishinga (Project management)

Akimara gutorerwa uyu mwanya Nyamurinda yavuze ko azaharanira gukorera hamwe, guteza imbere isuku mu mujyi wa Kigali ndetse no guharanira icyarushaho guteza imbere umujyi wa Kigali