Umuganga w'umunyarwanda, Dr. Raymond Dusabe, yiciwe muri Afurika y'Epfo

Ibitaro byitiriwe umwami Faisal biratangaza ko bibabajwe n'inkuru y'incamugongo y'urupfu rwa Dr. Raymond Dusabe wari umuganga wa mbere w’umunyarwanda wavuraga kanseri zifata mu myanya ndangagitsina y’abagore (Gynecological Oncology) muri ibi bitaro.

Umuyobozi ushinzwe abaganga mu bitaro byitiriwe umwami Faisal Dr. Emmanuel Nkusi yemeje ko ejo kuwa mbere mu ma saa saba z'amanywa aribwo bakiriye iyi nkuru y'urupfu rwa Dr. Dusabe ngo wari uruhukiye mu mujyi wa Cape town ho muri Afurika y'Epfo.

Uhagarariye u Rwanda muri Afurika y'Epfo, Amb. Vincent Karega nawe wemeje iby'urupfu rwa Dr. Dusabe yavuze ko polisi ikomeje iperereza ku mpamvu z'urupfu rw'uyu munyarwanda.

Dr. Raymond wari ukiri ingaragu yavutse tariki 8 z'ukwezi kwa 7 mu 1976, mu kwezi kwa Mata 2017 nibwo Dr Dusabe wari urangije kwiga amasomo ajyanye no kuvura kanseri zifata imyanya y’ibanga y’abagore muri Stellenbosch University muri Afurika y’Epfo, yatangiye kuvura mu bitaro byitiriwe Umwami Faisal.

Nkuko byemezwa na Dr. Emmanuel Nkusi ushinzwe abaganga muri ibyo bitaro, Dr. Dusabe yahawe uruhushya rw'ikiruhuko gisanzwe tariki 22 z'ukwezi kwa 12. 2017 agomba kugaruka ku kazi taliki 08 z'ukwa mbere uyu mwaka.

Inkuru mu mashusho: