Ubusobanuro RSSB yatanze kuri Miliyari zirenga itarishyuza ntibwanyuze PAC

Ikigo cy'ubwiteganyirize cy'u Rwanda RSSB cyitabye komisiyo y'inteko ishinga amategeko umutwe w'abadepite ishinzwe gukurikirana imikoreshereze y'imari n'umutungo bya leta PAC. Ubuyobozi bw'iki kigo bwabanje kugaragaza ibibazo bijyanye no guhuza ibikorwa by'iki kigo.

Umuyobozi w'inama y'ubutegetsi ya RSSB, Dr Gakwaya Innocent, avuga ko ibi bibazo byatewe no guhuza icyahoze ari caisse sociale, RAMA ndetse na mutuelle de sante byatumye abakiriya biyongera bavuye ku bihumbi 20 bagera kuri miliyoni 12, bituma imicungire yabo igorana.

Ikindi mu byashyizwe mu majwi na PAC, ni umwenda wa miliyari 6 na miliyoni 140, RSSB itarishyuza, ariko hakaba nta buryo bugaragara bwashyizweho bwo kwishyurwa. Umuyobozi mukuru wa RSSB Gatera Jonathan, yavuze ko bamaze kuvugana n'ababafitiye iyi myenda barimo MININFRA n'umujyi wa Kigali uburyo aya mafaranga azishyurwa.

Ikindi cyagaragaye ni ikibazo cy'amafaranga (atatangajwe) yagiye ku nyigo ya baringa zitakozwe, kugeza ubu hakaba hari abakozi bakiri gukurikiranwa n'ubutabera.