Rwamagana: Abarwayi 500 basuzumwe indwara y'ishaza

Mu karere ka Rwamagana abantu barenga 250 barwaye indwara y’amaso bakunze kwita “Ishaza’’, biteganijwe bazahabwa ubuvuzi bwo kubagwa amaso ku buntu muri iki cyumweru.

Itsinda ry’abaganga b’inzobere kabuhariwe mu buvuzi bw’amaso ndetse no kuyabaga, baturutse mu gihugu cya Espagne, bakaba bari mu muryango witwa Barraquer Foundation, batangiye igikorwa cyo gusuzuma abarwayi bagera kuri 500 bafite icyo kibazo, guhera mu mpera z’icyumweru gishize kugeza n’ubu.

Muri iki cyumweru cyo kuvura abo barwayi, cyizarangwa kandi no guha ibihembo abaganga bo kurwego rw’abadogiteri babiri babaye indashyikirwa mu mikorere yabo, bahabwe amahirwe yo kujya kwigira I Barcelona muri Espagne, kugirango babashe kongera ubumenyi ndetse n’ubunararibonye bwabo.

Abahanga mu by’ubuvuzi bw’amaso bavuga ko Indwara y’ishaza ishobora gutera ubuhumyi mu gihe yaba itavuwe hakiri kare, ariko ngo ni indwara ivurwa igakira nk’uko bitangazwa na Dr Barraquer, Umwe mu bakuriye iryo tsinda ryaturutse muri Espanye.