RRA yakanguriwe kunoza itumanaho mu rwego rwo kongera imisoro ku kigero cya 20%

Ubushakashatsi bwagaragajwe n'ihuriro nyafrica ry'ibigo by'imisoro n'amahoro (ATAF: African Tax administration Forum) buragaragaza ko ikigo cy'imisoro n'amahoro mu Rwanda gikwiye kugira uburyo bunoze bw'itumanaho bugihuza n'abasora, kuko byatuma imisoro yiyongeraho 20% buri mwaka.

Bumwe mu buryo bw'itumanaho buvugwa muri ubu bushakashatsi bwa ATAF ni ubukoresha ubutumwa bugufi kuri za Telephone, gukoresha E-Mail, kwandikira abasora amabaruwa n'ibindi. Gusa Bamwe mu basora bavuga ko hari igihe batamenya ubutumwa bohererejwe icyo buvuga bitewe n'ikibazo cy'ururimi.

Ibi bigatuma batizera ikoranabuhanga bakaza kwibonanira n'abatanga service z'imisoro imbona nkubone.

Ikigo cy'imisoro n'amahoro cyo kiravuga ko kigiye kwihutisha ishyirwa mu bikorwa ry'ibyavuye muri ubu bushakashatsi.

Umunyamabanga w'ihuriro rishinzwe imisoresherezwe muri Africa, Logan Wort  avuga ko ikigo cy'imisoro n'amahoro gikwiye kwagura ishoramari gikora mu bigendanye n'itumanaho hagati yacyo n'abasora. Ibi bikozwe mu gihe cy'umwaka umusoro ikigo cy'imisoro n'amahoro (RRA) gikusanya wakwiyongeraho hafi miliyari 7 n'igice z'amafranga y'u Rwanda:

Komiseri mukuru w'Ikigo cy’imisoro n'amahoro Richard Tusabe avuga ko ubu bushakashatsi bubahaye umukoro wo kuvugurura imikorere, cyane cyane barushaho kumenya abasora:

Mu kumurika ubu bushakashatsi bwanashyikirijwe ikigo cy'imisoro n'amahoro, hagaragajwe ko hakwiye kujya habaho uburyo bwo kumenyesha abasora akamaro ko gusora, bakamenyeshwa uko bahagaze mu gusora aho kuzajya bamenyeshwa italiki ntarengwa yo kwishyura imisoro cyangwa ibijyanye n'ibihano gusa.