Perezida Paul Kagame yahuye n'umushumba wa Kiliziya Gatolika ku isi Papa Francis

Perezida wa republika Paul Kagame kuri uyu wa mbere yahuye na papa Francis, i Roma mu Butaliyani, aho ari mu ruzinduko rw'akazi.

Ku mugoroba w’ejo ku Cyumweru tariki 19 Werurwe 2017 nibwo Perezida Paul Kagame yageze i Roma mu Butaliyani aho yitabiriye ubutumire bw’umushumba wa Kiliziya Gaturika ku Isi, Papa Francis nk’uko bitangazwa na Village Urugwiro.

Abinyujije ku rubuga rwa Twitter, Minisitiri w’Ububanyi n’Amahanga akaba n’Umuvugizi wa Guverinoma, Louise Mushikiwabo na we yemeje aya makuru avuga ko Kagame na Papa bazaganira ku mubano hagati y’u Rwanda na Vatikani.

Yagize ati “Perezida Kagame ari i Roma aho yatumiwe na Papa kuganira ku mubano w’u Rwanda na Vatikani. Aturutse mu ruzinduko rw’ingirakamaro mu Bushinwa.”

Uru ruzinduko rukurikiye kuba ku wa Gatandatu ku ya 18 Werurwe, Papa Francis yari yatangaje ko ashyizeho intumwa ye nshya mu Rwanda, Musenyeri Andrzej Jowzowicz.