Perezida Kagame yitabiriye inama ihuza u Burayi na Afurika muri Austria

Perezida wa Repubulika Paul Kagame akaba n’umuyobozi w’umuryango w’Afrika yunze ubumwe yamaze kugera i Vienna muri Austria, ahazabera ku munsi w’ejo inama yo ku rwego rwo hejuru izahuza u Burayi na Afrika.

Perezida Kagame akazafatanya n’umukuru wa guverinoma ya Austria, Chancellor Sebastian Kurz unayobora muri iki gihe Perezidansi y’inama y’umuryango w’ubumwe bw’u Burayi.

Iyi nama yo kuri uyu wa kabiri ifite insanganyamatsiko igaruka ku bufatanye mu gihe ikoranabuhanga rikataje. Izibanda ku kugaragagaza amahirwe ari mu bukungu bushingiye ku ikoranabuhanga nk'uburyo bwo koroshya ubufatanye n'uburumbuke ku migabane yombi.

Ni inama yitabirwa n’abakuru b’ibihugu na za guverinoma zitandukanye ku mugabane wa Afrika n’Uburayi, abayobozi b’ibigo mpuzamahanga by’ubucuruzi ndetse n’abandi bayobozi bayobora inzego zifata ibyemezo mu bigo n’inzego za leta cyangwa iz’abikorera.