Perezida Kagame yasabye aba ofisiye bashya kugendana n'aho isi igeze mu bumenyi

Perezida wa Repubulika Paul Kagame, akaba n'umugaba w'ikirenga w'ingabo z'u Rwanda, kuri uyu wa kane,  yahaye amapeti abasirikare 478 barangije imyitozo ibagira aba-ofisiye bato mu ngabo z'u Rwanda. Muri bo harimo 68 b'igitsina-gore bahawe ipeti rya sous Lieutenant.

Ni imyitozo bamwe muri abo basirikare bamazemo igihe kigera ku mwaka abandi bamaramo amezi 7, ku bafite ubumenyi bwihariye nk'abaganga ndetse n'aba 'ingenieurs'

Aya mahugurwa agamije gutuma aba basirikare baba ingabo z'umwuga ndetse akanabafasha guzasohoza inshingano zabo neza.

Umuyobozi w'ishuli rya Gisirikare rya Gako Col Tom Mpaka avuga ko bimwe mu bikubiye mu nyigisho zahawe aba ba-ofisiye yari ajyanye no guhindura imyitwarire.

Umukuru w'igihugu Paul Kagame yavuze ko uko isi igenda itera imbere, ari nayo mpamvu ubumenyi nabwo bugenda bukenerwa, ibintu avuga ko u Rwanda rutagomba gusigara inyuma. Aha yavuze ko ingabo z'igihugu zifite amateka maremare ariko kugeza ubu izi ngabo zikaba zimaze kugaragara uruhare rukomeye mu gukorera abaturage no gufatanya nabo.

Aba bahawe amapeti  bari mu byiciro bitatu harimo abari bamaze umwaka umwaka, abigiye mu mashuri yo mu karere ndetse nabize ibijyanye no gutwara indege za gisirikare. Muri uyu muhango kandi hahembwe abanyeshuri bitwaye neza kurusha abandi muri aya mahugurwa.