Perezida Kagame yakiriwe na Perezida Felipe Nyusi wa Mozambique

Perezida wa Republika Paul Kagame yageze i Maputo muri Mozambique aho yatangiye uruzinduko rw'akazi rw'iminsi ibiri.

Ministre w'ububanyi n'amahanga Louise Mushikiwabo abinyujije ku rukuta rwe rwa Twitter yasobanuye ko muri uru ruzinduko ibizaganirwaho ari ubufatanye bw'ibihugu byombi mu nzego zitandukanye zirimo ubuhinzi, uburobyi, ibikorwa remezo, ubutabera n’izindi.

Ministre Mushikiwabo nawe uri muri Mozambique yasobanuye ko we yaraye abonanye n'abanyarwanda baba i Maputo, umurwa mukuru wa Mozambique.

Biteganyijwe kandi ko ejo ku wa kabiri perezida Kagame azatanga ikiganiro kizibanda ku ruhare rw’abikorera mu Rwanda mu iterambere ry’igihugu.

Ni ikiganiro kizitabirwa n’abantu batandukanye barimo ba rwiyemezamirimo, abarimu n’abashakashatsi, abanyeshuri ndetse n’abanyamakuru.

Mozambique ishima umuvuduko w’u Rwanda mu iterambere, aho rukomeje  kwiyubaka mu bukungu rushingiye ku buhinzi, inganda na serivisi.