Perezida Kagame ari mu Bwongereza mu nama ya Wall Street Journal kuri Afurika

Perezida wa republika Paul Kagame ari mu gihugu cy'u Bwongereza aho kuri uyu mugoroba wo kuwa kabiri yagiranye ikiganiro n'ikinyamakuru 'The wall Street Journal' cyandika ku nkuru z'ubukungu n'amasoko y'imali n'imigabane.

Iki kiganiro cyari gifite insanyamatsiko igira iti: Investing in AfriCa: Africa's past and future, bivuze ngo gushora imari muri Afrika: ejo hashize n'ahazaza ha Afrika.

Ni ikiganiro cyayobowe n'umunyamakuru w'inararibonye Gerard Baker.

Perezida Kagame yamusobanuriye uko abona ishoramari kuri uyu mugabane, aho yagaragaje ko wakagombye kuba warakuye amasomo mu gutegera amaboko amahanga, kuko nta cyo byayigejejeho.

 Yemeza ko Afrika ikwiye kurushaho kwishyira hamwe, kandi ikabyaza umusaruro umutungo kamere ifite ndetse n'imbaraga z'abayituye. 

Perezida Kagame yakiriwe n'imbaga y'abanyarwanda batuye mu bwongereza, aho batonze imirongo ku mihanda n'ibyapa byanditse amagambo ashyigikira umukuru w'igihugu.