Nubwo urubyiruko rwirukira mu mujyi, mu cyaro ngo hari imirimo

Nyirasanzamahoro Eugenie w’imyaka 29, n’umwe mu rubyiruko rwo mu murenge wa Gakenke mu karere ka Gakenke. Nkuko abivuga, ubworozi bw’inkoko amaze imyaka isaga 3 akora buramutunze, ndetse akabasha no gutanga akazi ku bandi.

Mu nkoko yorora zisaga maganatandatu, iyo zitera zose, amagi abonamo amwinjiriza amafaranga atari munsi y’ibihumbi 120 (120.000Frw) mu cyumweru kimwe gusa. Aha niho ahera ashishikariza urubyiruko kubyaza amahirwe yo kwihagira imirimo aboneka mu cyaro, aho kwirukira mu mijyi.

Umuryango wa  Nyirasanzamahoro Eugenie w’imyaka 29 n’umugabo we Munyaneza Charles w’imyaka 30 n’umwana wabo umwe, batuye mu mudugudu wa Nyamabuye akagali ka Rusagara mu murenge wa Gakenke akarere ka Gakenke. Ngo batunzwe ahanini n’umushinga w’ubworozi watangijwe n’uyu mugore. Mu nkoko magana 6 batunze, izitera ni 200, k’umunsi mu magi babona, bakaba bakuramo amafaranga atari munsi  y’ibihumbi 350.

Mu mihigo uyu muryango wihaye, ngo nuko uyu mwaka uzarangira bageze nibura ku Nkoko 1000. Naho mu bibazo bahura nabyo mu bworozi bwabo, harimo kutabona hafi abaganga b’amatungo magufi.