Ministre w'intebe yatashye ikigo cyo kurwanya ihohoterwa rishingiye ku gitsina

Ministre w'intebe yatashye ku mugaragaro ikigo cy'icyitegererezo mu karere kizafasha kurwanya ihohoterwa rishingiye ku gitsina n'irikorerwa abana. Ni ikigo gikorera ku cyicaro cya police y'u Rwanda ku Kacyiru, kizaba gifite inshingano zo kurandura iri hohoterwa rishingiye ku gitsina n'irikorerwa abana.

Iki kigo cyuzuye gitwaye amafaranga y'u Rwanda asaga miliyoni 700 z'u Rwanda kizajya gikorerwamo amahugurwa, ubushakashatsi n'ikusanyamakuru ku ihohoterwa rishingiye ku gitsina n'irikorerwa abana

Iki kigo kizajya gikora ubushakashatsi, cyongerere ubushobozi inzego z'umutekano n'abasivili, hagamijwe gukumira no kurwanya ihohoterwa rishingiye ku gitsina. Kizajya gifasha gutangaza gahunda akarere gafite no gusaranganya ibyiza bigenda bigerwaho muri aka karere mu rwego rwo gushyira iherezo ku ihohoterwa rishingiye ku gitsina n'irikorerwa abana.

Nyuma yo gutaha ku mugaragaro iki kigo, hahise hatangira ihuriro ku masezerano mpuzamahanga ya Kigali, ryiga ku ruhare abagore bari mu nzego z'umutekano bagira mu bikorwa byo kubungabunga amahoro n'umutekano muri Afrika.