Ministeri y'ubutabera yakiriye intumwa ziturutse mu Buholandi

Intumwa z'u Rwanda n'iz'u Buholandi zahuriye i Kigali kuri uyu wa 3 mu nama ya 2 igamije gushyira mu bikorwa amasezerano impande zombi zashyizeho umukono, arebana no guteza imbere ubutabera no gushimangira amahame y'igihugu kigendera ku mategeko.

Ku itariki ya 13 Ugushyingo 2014, Minisiteri y’Ubutabera y’u Rwanda nibwo yasinyanye aya masezerano y’ubufatanye na Minisiteri y’Ubucuruzi n’Ububanyi n’Amahanga y’Ubuholandi.

Insanganyamatsiko y’iyi nama iragira iti “dufatanye kubaka ubutabera umuturage afitemo uruhare kandi bumuhendukiye”

Ibiganiro biribanda ku ruhare rw’uwakorewe icyaha mu mirimo y’Inzego z’Ubutabera, uburyo izindi nzira zo gukemura amakimbirane zakunganira ubucamanza mu gutanga ubutabera, kongera gusubiza mu murongo abarangwa n’imyifatire ihungabanya ituze n’umudendezo by’igihugu  binyuze mu bigo ngororamuco.

Ibihugu byombi bizigira ku ngero nziza hagamijwe guteza imbere ubutabera  bwabyo.

Ubuhorandi burishyimira urwego ubutabera bw'u Rwanda rugezeho nko gukoresha ikoranabuhanga mu kwakira ibirego by'abaturage. Ubuhorandi butanga miriyoni 5 z'amayero mu gushyigikira urwego rw'ubutabera mu Rwanda.