Min. Munyeshyaka avuga ko ibyoherezwa hanze byiyongereyeho 50%

Minisitiri w'ubucuruzi n'inganda Vincent Munyeshyaka yagiranye ikiganiro n'abagize ihuriro ry'igihugu nyunguranabitekerezo ry'imitwe ya politike mu Rwanda kuri uyu wa kane.

Yababwiye ko Leta y'u Rwanda irimo kureba uburyo ibiciro by'amashanyarazi ku nganda zikora ibikorerwa mu Rwanda byagabanywa ndetse n'umusoro ku bikoresho byabyo bikagagabanuka mu rwego rwo gucyemura ikibazo cy'ibikorerwa mu Rwanda bigihenze.

Avuga ko igabanywa ry'ibiciro by'amashanyarazi kugeza ubu bitagize icyo bitanga kinini nkuko byari byifujwe. Ikindi kandi ngo ni ukorohereza izi nganda zikorera mu Rwanda kubona inguzanyo muri BDF nkuko Minisitiri w'Ubucuruzi n'inganda yabigaragaje.

Avuga ko muri iki gihembwe cya 3 cy'ingengo y'imari y'uyu mwaka wa 2017, ibyoherezwa mu mahanga muri gahunda ya Made in Rwanda byazamutseho 50% mu gihe kandi ibitumizwa mu mahanga byagabanusteho 3.2%

Mu byagabanutseho cyane harimo imyenda ya caguwa yinjira mu gihugu mu gihe imyenda yoherezwa hanze yazamutse.