Madamu wa Perezida wa Benin ari mu ruzinduko mu Rwanda

Madamu wa perezida wa Repubulika ya Benin, Claudine Talon, yaraye ageze mu Rwanda mu ruzinduko rw’akazi rw'iminsi ine. Akigera ku kibuga mpuzamahanga cy’indege cya Kigali i Kanombe, Madamu Claudine Talon yakiriwe na mugenzi we w’u Rwanda Madamu Jeannette Kagame. Mu ruzinduko rwe azasura imishinga na gahunda bitandukanye by’umuryango Imbuto Foundation birimo ibijyanye no guteza imbere uburezi, ubuzima, ubukungu, urubyiruko n’umuryango muri rusange.

Kuri uyu wa kabiri mu masaha y'igitondo, arasura ikigo Isange One Stop Center anasobanurirwe uburyo bwo kwita ku muryango (Family Package) burimo gufasha mu gukumira ko umubyeyi utwite yanduza umwana virus itera Sida (PMTCT), hakiyongeraho na serivisi y’ubujyanama ku miryango y'abafite virus itera Sida. Ku gicamunsi, nibwo arasura urwibutso rwa Jenoside rwa Kigali ku Gisozi, yunamire inzirakarengane zirushyinguyemo.

uruzinduko rwa Claudine Talon ruje rukurikira urwa perezida wa Benin Patrice Talon uheruka mu Rwanda mu mezi 2 ashize.

Umubano w’u Rwanda na Benin ukomeje kwaguka mu gihe mu ntangiriro z’uyu mwaka ibihugu byombi byasinyanye amasezerano y’ubufatanye agamije imikoranire myiza hagati ya Kompanyi z’indege zabyo. Ni amasezerano yitezweho gutanga amahirwe akomeye ku bashoramari b’abanyarwanda n’abo muri Benin, yo gushora imari mu bice bitandukanye by'ibyo bihugu byombi, haba mu bijyanye n’umuco, ubucuruzi n’ibindi.