MIFOTRA yagaragaje igipimo cy'ubushomeri mu Rwanda mu nama ya NEP-KORA WIGIRE

Guverinoma y'u Rwanda irashimangira ko gahunda ya NEP KORA WIGIRE ari igisubizo ku iterambere ry'igihugu. Ibi Minisitiri w'Abakozi ba Leta n'Umurimo Judith Uwizeye abitangaje muri iki gitondo mu kiganiro n'abanyamakuru, kigamije kugaragaza uko isoko ry'umurimo rihagaze mu gihugu hamwe n'ubukangurambaga kuri gahunda igamije guhanga imirimo mu gihugu.

Iki kiganiro kirimo bamwe mu bagize guverinoma hamwe n'abafatanya bikorwa batandukanye.
Ibarura rya Kane ku iterambere ry'imibereho y'ingo EICV 4 ryagaragaje ko muri rusange abanyarwanda 2% badafite akazi.
Mu mijyi icyo gipimo kiri ku 8% mu gihe mu barangije amashuri yisumbuye na Kaminuza igipimo cy'ubushomeri kiri kuri 14%.

Ubukangurambaga kuri gahunda ya KORAWIGIRE bwatangiye ku wa 20 Ukwakira 2016 ikazageza ku wa 21 Ugushyingo 2016. Ngo buzibanda kugukangurira ibyiciro byihariye nk'urubyiruko, abagore n'abafite ubumuga kwiga amasomo y'imyuga n'ubumenyi ngiro no kubyaza umusaruro amahirwe Leta yashyizeho. 

Muri ayo mahirwe harimo inguzanyo y'ibikoresho byo gutangira umwuga aho uyihawe yishyura 50% gusa.