#KwegeraAbaturage: Perezida Kagame arasura abaturage b'akarere ka Nyagatare

Perezida wa republika Paul Kagame kuri uyu wa mbere arasura akarere ka Nyagatare mu Mirenge ya Matimba na Karangazi. Biteganyijwe ko ahahurira n'abaturage bo muri iyi mirenge ndetse n'abo mu yindi ihegereye.

Perezida Kagame yaherukaga gusura Nyagatare ku ya 13 Ugushyingo 2014 aho yaganiriye n’abaturage barenga ibihumbi 30 mu Murenge wa Gatunda.

Umuyobozi wako Mupenzi George avuga ko mu byo bamurikira umukuru w'igihugu, harimo n'uko bahanganye n'imihindagurikire y'ibihe dore ko yemeza ko ubu umusaruro wagenze neza.

Mu mwaka w'2014 Umukuru w’Igihugu yasezeranyije abaturage ba Nyagatare ibikorwa byinshi birimo amazi meza, imihanda, amavuriro, amashanyarazi n’ibindi. Byinshi byarakozwe, ibindi biri ku musozo uretse ikigo nderabuzima cya Gatunda cyagombaga guhinduka ibitaro na Stade y’umupira w’amaguru ikiri mu nyigo.