Kimironko:Gereza ya Gasabo yafashwe n’inkongi y’umuriro

Mu gitondo cyo kuri uyu wa gatanu tariki 31 Werurwe 2017, Gereza ya Gasabo iherereye mu Murenge wa Kimironko yibasiwe n’inkongi y’umuriro.

Umunyamakuru wa RBA wari aho ibi byabereye yavuze ko ibimodoka bizimya umuriro byihutiye gutabara ndetse n’umutekano w’agace gereza iherereyemo ukaba urinzwe bikomeye.

abapolisi bafatanyije n’Ingabo z’Igihugu n’izindi nzego z’umutekano bakaba bari mu gikorwa cyo kurinda umutekano kuri iyi gereza kugirango hatagira igihungabanya umutekano kuri iyi gereza.Imodoka zizimya inkongi  za Polisi y’Igihugu zahageze zifashwa n’iyindi nini yavuye ku Kibuga cy’Indege Mpuzamahanga cya Kigali.

Abayobozi barimo umukuru w’Urwego rushinzwe Imfungwa n’Abagororwa (RCS), CGP George Rwigamba, Umuyobozi w’Akarere ka Gasabo, Rwamurangwa Stephen n’abandi bageze kuri iyi gereza ya Kimironko ngo bakurikirane uko ikibazo giteye.

Umuvugizi w'urwego rw'amagereza CIP Sengabo Hillary yavuze ko kugeza ubu ibikorwa byo kuzimya umuriro byahagaze. Kugeza ubu amakuru aravuga ko abantu 7 aribo bakomerekeye muri iyi mpanuka.