Kigali: Ibura ry'amabuye ryatumye imihanda imwe yari kubakwa ihagarikwa

Ubuyobozi bw’umujyi wa Kigali buravuga kandi ko imihanda yo mu ma karitsiye yari yaratangiye gukorwa nyuma igahagarara byatewe n'ibura ry'amabuye akoreshwa mu kubaka iyo mihanda. Cyokora ngo bitarenze ukwezi kwa gatandatu uyu mwaka, biteganyijwe ko iyo mihanda izaba yarangije gukorwa.

Imihanda yagombaga kubakwa hirya no hino mu mujyi wa Kigali ireshya na kilometero 105, ikaba yaragombaga kubakishwa amabuye. Gusa umuyobozi w'umujyi wa kigali wungirije ushinzwe iterambere ry'ubukungu BUSABIZWA Parfait, avuga ko ayo mabuye atabonekeye rimwe ariko uduce tumwe na tumwe twagiye dushyirwamo kaburimbo.

Uretse imihanda yatangiye gukorwa, ngo hari n'indi izaba yatangiye gukorwa mu byumweru bibi biri imbere, ku buryo mu kwezi kwa gatandatu yose izaba yarangiye.

Ubuyobozi bw’umujyi wa Kigali bwavuze kandi ko mu ngengo y'imari y'umwaka utaha, hari indi mihanda iteganyijwe gukorwa harimo umuhanda wa Cyivugiza wari waratangiye gukorwa, ndetse n'igice cya Kibagabaga kizaba gisigaye.