Itsinda riyobowe na Ministiri Moiwo KaiKai ryasuye u Rwanda mu gihe cy'iminsi 14

Minisitiri w’ubutegetsi bw’igihugu n’amajyambere cy’icyaro muri Sierra Leone Maya Moiwo KaiKai aravuga ko u Rwanda ari kimwe mu bihugu by’Afurika bikomeje kugaragaraza imiyoborere myiza.

Kuri we asanga ibi biterwa na gahunda nziza zirimo no kwegereza abaturage ubuyobozi n’ubushobozi. We n’itsinda ayoboye bari mu Rwanda mu ruzinduko ruzamara ibyumweru bibiri, aho bazasura inzego n’ibikorwa bitandukanye.

Minisitiri w’ubutegetsi bw’igihugu n’amajyambere cy’icyaro muri Sierra Leone Maya Moiwo KaiKai n’itsinda ayoboye basuye minisiteri y’ubutegetsi bw’igihugu. Basobanuriwe ubunararibonye bw’u Rwanda mu myaka 16 rumaze rutangije politiki yo kwegereza abaturage ubuyobozi n’ubushobozi.

Ministiri Maya Moiwo Kaikai, yavuze ko kimwe mu byamushimishije mu Rwanda, ari uruhare rw'abaturage muri gahunda zibagenewe.

Iki gihugu cya Sierra Leone cyahuye n'ibibazo bitandukanye birimo intambara hagati y'abaturage ndetse n’icyorezo cya Ebola, byose byagize ingaruka ku bukungu n’iterambere. Ni igihugu kigikeneye kwiyubaka muri byinshi birimo imiyoborere igamije iterambere ry'abaturage.

Mu ruzinduko rw'iminsi 14 bazamara mu Rwanda, aba bayobozi bashinzwe imiyoborere n’amajyambere y’icyaro muri Sierra Leone, bazasura ibigo bitandukanye bifite aho bihuriye n'ubutegetsi bw'igihugu, ndetse banitabire gahunda z'iterambere ry'abaturage zirimo umuganda na gahunda z'ukwezi kw'imiyoborere, hagamijwe kureba uko zikora.