Imvura idasanzwe yatumye uruzinduko rwa Perezida Kagame muri Nyagatare rusubikwa

Kubera imvura y’umurindi yakomeje kugwa I Nyagatare mu Burasirazuba, uruzinduko rwa Nyakubahwa perezida wa Repubulika Paul Kagame rurasubitswe muri ako karere kugira ngo abaturage batanyagirwa.

Perezida Kagame yari gusura abaturage b’akarere ka Nyagatare, nyuma y’uko ku munsi w’ejo hashize ku wa Gatatu yari mu karere ka Ngoma, aho yaganiriye n’abagatuye, abasaba gushyiramo imbaraga nyinshi muri gahunda yo kurwanya ubukene.

Nyuma yo gusura abaturage b'akarere ka Ngoma, umukuru w'igihugu yahuye n'abavuga rikumvikana mu karere ka kayonza.

Ibiganiro by’umukuru w’igihugu n’abavuga rikumvikana bo mu ntara y’iburasirazuba, byaranzwe ahanini no kungurana ibitekerezo ku iterambere ry’iyi ntara, hagamijwe kureba uruhare rwa buri ruhande.

Iyi nama yabaye hashize igihe gito hatowe imbonezamihigo, yatanze ikizere ko aba bavuga rikumvikana biyemeje gukora cyane kugirango bagere ku nshingano biyemeje.