Hon. Mukabalisa yakiriye Dr. Alim Tunc umudepite mu nteko ya Turukiya

Perezida w'inteko umutwe w’abadepite, madame Mukabalisa Donatille yakiriye Dr. Alim Tunc, umudepite mu nteko ishinga amategeko ya Turukiya, akaba na perezida w’itsinda ry’umubano hagati y’abadepite ba Turukiya n’ab’u Rwanda. 

Dr Alim Tunc avuga ko urugendo rwe rugamije gutangiza umubano uhamye hagati y’inteko zishinga amategeko z’ibihugu byombi. Yagize ati,"naje muri gahunda yo gutangiza imikoranire ihamye y’inteko zombi, no kureba icyakorwa mu guteza imbere umubano hagati ya Turukiya n’u Rwanda, n’imikoranire mu bijyanye n’ubukungu, umuco n’ubukererugendo."

Yazanye kandi n’itsinda ry’abagiraneza bazakora ibikorwa by’ubugiraneza, ndetse bakanatanga impano muri uku kwezi kw’igisibo cy’abayisilamu. Ku ruhande rwe, perezida w’umutwe w’abadepite, madame Mukabalisa Donatille avuga ko uruzinduko rugiye gushimangira umubano w’inteko zombi, kandi ko banagize umwanya wo kumugaragariza intambwe u Rwanda rumaze gutera.