Byitezwe ko Perezida wa Tchad Idriss Deby agera mu Rwanda kuri uyu wa gatatu

Perezida wa Tchad ari nawe uyoboye Umuryango wa Afurika Yunze Ubumwe (AU), Idriss Déby, kuri uyu wa Gatatu tariki 22 Kamena, aragera i Kigali aho aza kugirana ibiganiro na Perezida wa Repubulika y’u Rwanda, Paul Kagame.

Uruzinduko rwa Perezida Idriss Deby rukaba ruje rukurikira urwa Perezida wa Komisiyo y’Umuryango wa Afurika Yunze Ubumwe, Dr Dlamini Zuma, mu cyumweru gishize wagaragarijwe aho u Rwanda rugeze rwitegura inama ya 27 y’Abakuru b’ibihugu bigize uwo muryango.

Iyi nama u Rwanda ruzayakira guhera kuwa 10-18 Nyakanga, nkuko byanaganiriweho kuwa 13 Kamena ubwo Minisitiri w’Ububanyi n’amahanga w’u Rwanda, Louise Mushikiwabo, yakirwaga na Perezida Idriss muri Tchad.

Biteganyijwe ko nibura inama ya AU izitabirwa n’abashyitsi babarirwa mu 3000 bo mu rwego rwo hejuru n’abakuru b’ibihugu na za Guverinoma bagera kuri 50.