Gatsibo: Minisitiri w'intebe Murekezi yifatanije n'abaturage mu muganda

Kuri uyu wa gatanu minisitiri w'intebe Anastase Murekezi  yifatanije n'abatuye akarere ka Gatsibo mu muganda udasanzwe ushishikariza abanyarwanda guhinga kijyambere, no kubyaza umusaruro igihembwe cy’Ihinga 2016 C.Yanasuye kandi ibikorwa bitandukanye birimo umushinga wo gufata amazi, uzafasha abaturiye igishanga Rwangingo-Karangazi kuhira imyaka.

Minisitiri w'intebe Anastase Murekezi yavuze ko Kuva 2000 Leta yashyize imbaraga mu guteza imbere kuhira kuko bitanga umusaruro mwinshi kdi umwaka wose bikanarinda n'inzara. Asobanura ko guverinoma y'u Rwanda yiyemeje gukomeza kugoboka abaturage bahuye n’ikibazo cy’inzara kdi hari ingamba zo guhangana nacyo byihuse.

Mu rwego rwo guteza imbere kuhira, u Rwanda rwihaye intego yo kuzaba rwuhira ubutaka bungana nibura na 100,000 ha muri 2020. Aha niho Guverinoma y'u Rwanda inahera irakangurira abahinzi borozi gukoresha amahirwe yo kunganirwa ku nkunga ya 50% ku bikoresho byifashishwa buhira.Ibikorwa byo kuhira imyaka ni kimwe mu bisubizo birambye guverinoma y'u Rwanda igaragaza, bishobora gutuma abahinzi bakomeza ibikorwa byabo by'ubuhinzi haba mu gihe cy’imvura cyangwa mu mpeshyi.