Gahunda ya SheTrades yatangijwe mu Rwanda

Mu gitondo cyo kuri uyu wa gatatu, Madamu wa perezida wa republika Jeannette Kagame yitabiriye umuhango wo gutangiza gahunda yiswe She trades, igamije guteza imbere ba rwiyemezamirimo b'abagore bakora ubucuruzi.Yagaragaje ko kuri ubu mu Rwanda hari uburinganire mu ngeri zose z'iterambere ry'igihugu kuko ari intego guverinoma yitaho mu kugena politiki zayo zijyanye n'ibikorwa by'iterambere.

Madamu Kagame,yavuze ko hari impamvu nyinshi ku isi usanga abagore batitabira ubucuruzi mpuzamahanga, bakigira mu ishoramari rito cyane.Yasobanuye ariko ko kuva mu myaka mike ishize mu Rwanda abagore bagenda bagira uruhare rugaragara mu iterambere ry'ubukungu n'imibereho myiza igihugu kigezeho.

Madamu Jeannette Kagame yashimiye urwego rw'abikorera n'abafatanyabikorwa mu iterambere ndetse n'imiryango itari iya Leta ku bwa gahunda zinyuranye bashyizeho zagiye zifasha abagore kuba ba rwiyemezamirimo.

Ashingiye ku mibare yerekanye ko uburyo abagore babonamo imari mu myaka itanu ishize bwiyongereye ku buryo bavuye kuri 16% bagera kuri 39% mu mwaka w'2016.

Abandi bafashe ijambo muri uyu muhango bagaragaje ko gutangiza iyi gahunda atari uguteza imbere ubucuruzi n'ubukungu bw'u Rwanda gusa, ahubwo harimo no kongerera ingufu umugore.