First Lady Jeannette Kagame yakanguriye abana b'abakobwa kugira icyerekezo

Madame wa Prezida wa Repubulika Jeannette Kagame arasaba abana b'abakobwa kugira intego mu buzima bitangira kare, kugirango bibafashe kugira icyo bamarira imiryango yabo n'igihugu muri rusange.

Ibi madam wa Prezida wa Repubulika yabivugiye mu karere ka Rulindo kuri uyu wa Gatandatu, ubwo yitabiraga umuganda rusange no gutangiza umwaka wa Gatatu wa gahunda yyiswe 12+ NiNyampinga, igamije gufasha abana b'abakobwa kwiremamo ikizere cy'ejo hazaza.

Urebye abana b'abakobwa, Madame Jeannette Kagame yanashimangiye ko hakenewe kureba uko na basaza babo, bagerwaho n'iyi gahunda, bityo nabo ikabafasha gukura bafite intego isobanutse y'ubuzima bwabo.

Umwaka ushize abana 80%, bitabiriye iyi gahunda ya 12+ bungukiyemo ubumenyi bwo gukora uturima tw'igikoni iwabo, bakanagira uruhare mu kugira inama imiryango yabo ku bijyanye n'imirire myiza. 63% bayobotse umuco wo kuzigama, naho 21% bari bamaze gufunguza za konti mu gihe 61% bafite ibikorwa bito bibazanira inyungu. Kugeza ubu hari ahantu hagera kuri 490 hazwi nko mu ruhongore cg “Safe Spaces” zashyizwe hirya no hino mu gihugu, zihuriraho abana b’abakobwa bagahabwa ubwo bumenyi butandukanye bukubiye muri gahunda ya 12+ Ni Nyampinga.