Abayobozi basezeye bwa nyuma nyakwigendera Nyandwi Desire

Abagize inteko ishinga amategeko imitwe yombi ndetse na bamwe mu bayobozi bakuru b'igihugu kuri uyu wa 1 basezeye bwanyuma kuri Depite Nyandwi Desire witabye Imana ku wa Gatanu w'icyumweru gishize aguye mu bitaro byitiriwe umwami Faisal. Ni umuhango wabereye mu ngoro y'inteko ishinga amategeko umutwe w'abadepite.

Mu butumwa bwa Nyakubahwa Perezida wa Repubulika, bwasomwe na Minisitiri Venantie Tugireyezu, yavuze ko Igihugu n'Abanyarwanda, babuze umuyobozi n' umukozi mwiza warangwaga n'ukuri no gukunda igihugu n'Abanyarwanda muri rusange.

nyuma yo kumusezeraho mu nteko ishinga amategeko Umuhango wo gusezera kuri depite Nyandwi wakomereje muri Paruwasi yitiriwe umwamikazi w’amahoro, Regina Pacis i Remera. Gushyingura byo birakorerwa ku irimbi rya Rusororo mu Karere ka Gasabo.

Mbere y'uko aba Depite kuva mu gushyingo 2002, Nyandwi Joseph Désiré, yabaye Perefe w’iyahoze ari Perefegitura ya Gitarama kuva kuwa 29 Ukwakira 1994 kugera 07 Gashyantare 1999. Kuva kuya 08 Gashyantare 1999 kugera kuya 15 Ugushyingo 2002 yari Minisitiri w’Ubutegetsi bw’Igihugu.