Abasirikare 24 bari mu mahugurwa yo kurinda ibikoresho mu butumwa bw'amahoro

Ikigo cy’igihugu cy’amahoro (Rwanda Peace Academy) harabera amahugurwa y’ibyumweru bibiri yagenewe abasirikare b’aba-officiers ku bijyanye n’imicungire y’ibikoresho mu bikorwa byo kubungabunga amahoro. Ni amahugurwa mpuzamahanga yitabiriwe n’abasirikare 24 bavuye muri Uganda, Kenya n’u Rwanda.

Barahabwa ubumenyi ku buryo aboherezwa mu butumwa bwo kubungabunga amahoro baba bafite n’inshingano zikomeye zo kwita ku bo bari kumwe banabungabunga ikitwa igikoresho cyose bifashisha kugira ngo bugende neza. Ayafungura ku mugaragaro Brig. General Dr Rudakubana Charles yagaragaje ko ari amahugurwa akubiyemo ubumenyi bwose aboherezwa mu butumwa bwo kubungabunga amahoro baba bakeneye.

Ayo mahugurwa yatewe inkunga na Leta y’u Bwongereza binyuze mu ishami ritera inkunga ibikorwa byo kubungabunga amahoro muri Africa y’iburasirazuba. Ambasadeur w‘icyo gihugu mu Rwanda William Gelling yemeje ko ibi bihugu uko ari 3 bifite ubunararibonye mu bikorwa byo kubungabunga amahoro n’imicungire myiza y’ibikenerwa n’ababwoherezwamo ari nayo mpamvu bateye inkunga ayo mahugurwa.