Abashoramari bakomeye bazitabira inama ya Youth Connekt Africa--Mukhisa Kitui

Perezida wa Repubulika Paul Kagame yakiriye umunyamabanga mukuru w'ishami ry'umuryango w'abibumbye rishinzwe ubucuruzi n'iterambere, ibiganiro byabo bikaba byibanze ku guteza imbere urubyiruko rukora ubucuruzi hifashishijwe ikoranabuhanga.

Perezida wa Repubulika ubwo yakiraga Mukhisa Kitui, umunyamabanga mukuru w'ishami rishinzwe ubucuruzi n'iterambere mu muryango w'abibumbye, bagarutse ku myiteguro y'inama nyafrika y'urubyiruko, Youth Connekt Africa. 

Perezida wa Repubulika yasabye ko muri iyi nama uyu muryango wa UNCTAD wazatumira abashoramari bakora ubucuruzi bwifashisha ikoranabuhanga, hagamijwe guteza imbere urubyiruko rwa Afrika. Mukhisa Kitui atangaza ko ibi yabyemereye umukuru w'igihugu, "Njye ubwanjye nzaza nzanye n'umuntu udasanzwe washinze akaba n'umuyobozi wa ALIBABA akaba ari Jackma, urabizi Jack Ma ni umuntu wageze kure mu bijyanye n'ikoranabunga ku rwego rw'isi, twumvikanye ko azashyigikira imishinga iciriritse ya ba rwiyemezamirimo bakiri bato, hakoreshejwe ikoranabunga, tukaba dufite igikorwa cy'inama ikomeye ku isi izaba irimo JACK MA nanjye ubwanjye muri Kigali.

Minisitiri w'ubucuruzi n'inganda n'ibikorwa by'umuryango wa Africa y'iburasirazuba Francios Kanimba avuga ko kuba u Rwanda ruzakira inama ya Youth Connekt UNCTAD ibifitemo uruhare ko ari amahirwe ku Rwanda. 

UNCTAD ikorana n'u Rwanda mu bikorwa biteza imbere ubucuruzi harimo n'ubwifashisha ikoranabuhanga nk'ubwa Electronic Single Window butuma abatumiza cg abohereza ibicuruzwa hanze babona service z'inzego zinyuranye za Leta icyarimwe.