Abanyarwanda bamwe bakundana binyuze ku mbuga nkoranyambaga

Bamwe mu batuye umujyi wa Kigali basanga ikoranabuhanga rimaze gufata indi ntera aho risigaye ryifashishwa mu gushakisha abakunzi. Ku rundi ruhande ariko hari abavuga ko ubu buryo bukwiye kwitonderwa kuko akenshi urwo rukundo rutaramba.

Uko imyaka igenda ishira ni ikoranabuhanga rya internet rirushaho koroshya ubuzima bw’abatuye isi, aho abantu bahurira ku mbuga nkoranyambaga bizwi nka social media cyangwa se imbuga za internet zitandukanye, bakamenyana, bakubaka ubushuti ndetse bamwe bikabaviramo guhura imbonankubone, bakaba bageza naho kurushinga.

Abantu bakundana barahujwe n'imbuga nkoranyambaga ntabwo bimenyerewe cyane hano mu Rwanda ariko byateye imbere mu bindi bihugu. Imibare igaragaza ko muri Leta zunze ubumwe za Amerika, abantu barenga 2,500 barambagiriza ku mbuga nkoranyambaga, aho buri mwaka hashyirwaho imbuga nshya 1,000 zihuza abashaka kubana.