Abantu 25 baturutse mu bihugu bitandukanye basuye Isange one-stop centre

Itsinda ry'abantu bitabiriye inama mpuzamahanga ku buringanire irimo kubera mu Rwanda ryasuye ikigo cya Isange one stop centre mu rwego kureba uburyo abahuye n'ihohoterwa rishingiye ku gitsinda bafashwa.

Ni itsinda ry'abantu bagera kuri 25 baturutse mu bice bitandukanye by'isi bari mu Rwanda, bamwe mu bagize iri tsinda bashimye imikorere y'iki kigo maze bifuza ko serivise nk'izi n'ibindi bihugu byareberaho bigatangira gushyiraho ibigo bifasha abahuye n'ihohoterwa.

Dr. Vuyo Mahlati ukomoka muri Afurika y'Epfo yagize ati, "Icyo mu byukuri nishimiye kandi mvanyemo ni ubunararibonye;ni ahantu bakirira abantu bagannye iyi centre, ndetse n'uburyo bakirwa n'abantu batandukanye, barimo abaganga, abazi imitekerereze ya muntu, Polisi, imikoranire yabo bareba ibintu bitandukanye kandi bakorera hamwe nk'itsinda n'ubunyamwuga bwabo, ndetse n'uburyo bakorana n'abanyamategeko mu buvuzi kugera mu rwego rw'ubutabera."

CSP Lynder Nkuranga yasobanuriye iri tsinda imikorera ya Isange one stop centre aho yababwiye umwihariko uhari mu gukurikirana abahuye n'ihohoterwa kugeza bahawe ubutabera. Umuyobozi w'ibitaro bya Kacyiru Pascal avuga ko ari ishema ku gihugu kuba amahanga yifuza kumenya intambwe u Rwanda rumaze gutera mu rwego rwo kwita ku bahohotewe.

Ubuyobozi bw'ibitaro bya Kacyiru byasobanuye ko ku munsi byakira abantu bagera ku 10 bahura n'ikibazo cy'ihohoterwa rishingiye ku gitsina, kugeza ubu abenshi mu bakenera iyi serivise baba biganjemo abana bari munsi y'imyaka 18.